АЖИЛД СОНГОН ШАЛГАРУУЛЖ АВАХ ЖУРАМ

Компанийн захиргаа нь компанийн бүтцийн нэгжийн батлагдсан орон тооны ажил, албан тушаалд мэргэжил, боловсрол, ур чадвар, ажил хэрэгч чанар зэрэг тухайн ажлын байрны тодорхойлолтод тусгагдсан шаардлагад нийцүүлэн, зохих шатны боловсрол, мэргэжил эзэмшсэн, ажлын дадлага, туршлагатай хүнийг сонгох, ажилтныг ажилд авах буюу томилох, ажлын байрын тодорхойлолт болон хөдөлмөрийн гэрээний нөхцлийг танилцуулах, гүйцэтгэх захирлын тушаал гаргах, хөдөлмөрийн гэрээг бичгээр байгуулах зэрэг ажлуудыг зохион байгуулна.

Сонгон шалгаруулалтанд орж хүний нөөцөд бүртгэгдсэн хүмүүсээс сонголт хийх боломжтой гэж үзвэл олон нийтэд зарлахгүйгээр ажилд авч  болно.

Компанийн хэмжээнд ажлын сул орон тоо гарсан тохиолдолд нийтэд зарлан мэдээлэх замаар ажилтныг сонгон шалгаруулж авна. Захиргаанаас 20 хоногийн дотор ажилтан сонгон шалгаруулж авах тухай зарыг өдөр тутмын сонин хэвлэл, мэдээллийн бусад хэрэгсэл, компанийн албан ёсны вэб сайт, facebooк зэрэг хэрэгслээр зарлаж, зохион байгуулна.

Орон тоо сул байгаа бүтцийн нэгжийн удирдах болон бусад албан тушаалтныг оролцуулан 3-аас доошгүй хүний бүрэлдэхүүнтэй ажлын хэсгийг гүйцэтгэх захирлын тушаалаар эсхүл захиргаанаас томилон зохион байгуулах ба ажлын хэсгийн дарга нь захиргааны удирдах албан тушаалтан байна.

Ажилтан сонгон шалгаруулах нь дараах үе шаттай байна.Үүнд:

Нэгдүгээр үе шат:

• Мэдээлэх зүйл:

а/ Ажил албан тушаалын нэр;

б/ Ажлын байранд тавигдах шаардлага;

в/ Бүрдүүлэх бичиг баримт;

г/ Материал хүлээн авах эцсийн хугацаа, хүлээн авах хаяг;

д/ Шалгаруулалт явуулах хугацаа; /материал хүлээн авсанаас хойш 10 хоног/

е/ Сонгон шалгаруулалтын төлбөрийн хэмжээ;

• Сонгон шалгаруулалтанд орох иргэний бүрдүүлэх бичиг баримт:

а/ Ажилд орохыг хүссэн өргөдөл;

б/ Иргэний үнэмлэхний /нотариатаар баталгаажуулсан/ хуулбар;

в/ Боловсролын гэрчилгээ, дипломын нотариатаар баталгаажуулсан хуулбар;

г/ Анкет;

д/ Хамгийн сүүлд ажиллаж байсан ажлын газрын тодорхойлолт, ажлаас чөлөөлөгдсөн тушаал;

е/ 3х4 хэмжээтэй 3 хувь цээж зураг;

ж/ Сонгон шалгаруулалтын төлбөр; /сонгон шалгаруулалтын ажлын ачаалал, гадны мэргэжлийн байгууллагаас хүмүүс авч ажиллуулах зэргээс шалтгаалан төлбөрийн хэмжээг захиргаанаас тухай бүр нь тодорхойлно/

Хоёрдугаар үе шат:

• Материал хүлээн авах, судлах, сонгон шалгаруулалт явуулах:

а/ Ажлын хэсгийн нарийн бичгийн дарга хэвлэл мэдээллийн хэрэгсэлд заасан хаягаар, заасан хугацааны дотор иргэдийн материалыг хүлээн авах;

б/ Заасан хугацааг хэтэрүүлсэн иргэдийн материалыг хүлээн авахгүй байх;

в/ Сонгон шалгаруулалтанд оролцох хүсэлтэй иргэд бүрдүүлсэн материалаа өөрийн биеэр болон цахимаар ажлын хэсгийн нарийн бичгийн даргад өгөх;

г/ Материал нь зохих ёсоор бүрдсэн иргэдийг сонгон шалгаруулалтанд оруулах;

д/ Мэргэжлийн дагуу ярилцлага хийх; /шаардлагатай тохиолдолд тестээр буюу бичгээр шалгалт авах/

е/ Тэнцээгүй иргэдэд анкетад бичсэн утсаар мэдэгдэх;

• Сонгон шалгаруулж авахдаа үндэслэл болгох зүйл:

а/ Ажлын байрны тодорхойлолт;

б/ Албан тушаалд тавих онцлог шаардлага;

в/ Мэдлэг мэргэжил, боловсролын түвшин, ажлын дадлага туршлага, ур чадвар,

г/ Эрүүл мэнд;

Гуравдугаар үе шат:

а/ Ажлын байрны тодорхойлолтонд  заасан шаардлагыг хангасан, ажлын байрны тодорхойлолт болон хөдөлмөрийн гэрээний нөхцлийг хүлээн зөвшөөрсөн, эрүүл мэндээр тэнцсэн, ажлын дадлага, туршлагатай хүнийг туршилтын хугацаагаар ажиллуулахаар гүйцэтгэх захиралд танилцуулж шийдвэрлүүлнэ.

б/ Туршилтын хугацаа нь гурван сараас илүүгүй байх бөгөөд харилцан тохиролцож нэг удаа гурван сараас илүүгүй хугацаагаар сунгаж болно. 

в/ Шаардлагатай гэж үзвэл гүйцэтгэх захиралын тушаалаар тухайн ажлын байранд шууд томилж болно. 

“МИАТ” ТӨХК